‘ಮ್ಯಾಂಗೋ ಪಚ್ಚಾ’ಗೆ ಡಿಜಿಟಲ್ ಎಂಟ್ರಿ: ಜಿಯೋಹಾಟ್‌ಸ್ಟಾರ್‌ನಲ್ಲಿ ಸಂಚಿತ್ ಸಂಜೀವ್ ಸಿನಿಮಾ ಸ್ಟ್ರೀಮಿಂಗ್

ಮೈಸೂರಿನ ಭೂಗತ ಲೋಕದ ಕರಾಳ ವಾಸ್ತವ ಹಾಗೂ ರಿಯಲಿಸ್ಟಿಕ್ ಕ್ರೈಂ ಕಥಾಹಂದರದೊಂದಿಗೆ ಮೂಡಿಬಂದಿರುವ ‘ಮ್ಯಾಂಗೋ ಪಚ್ಚಾ’ ಸಿನಿಮಾ ಇದೀಗ ಡಿಜಿಟಲ್ ವೇದಿಕೆಗೆ ಕಾಲಿಟ್ಟಿದೆ. ಕಿಚ್ಚ ಸುದೀಪ್ ಅವರ ಸೋದರಳಿಯ ಸಂಚಿತ್ ಸಂಜೀವ್ ನಾಯಕನಾಗಿ ಸ್ಯಾಂಡಲ್‌ವುಡ್‌ಗೆ ಪದಾರ್ಪಣೆ ಮಾಡಿರುವ ಈ ಚಿತ್ರವು ಸೆಪ್ಟೆಂಬರ್ 25ರಿಂದ ಜಿಯೋಹಾಟ್‌ಸ್ಟಾರ್‌ನಲ್ಲಿ ಡಿಜಿಟಲ್ ಸ್ಟ್ರೀಮಿಂಗ್ ಆರಂಭಿಸಿದೆ.

ಚಿತ್ರದಲ್ಲಿ ಸಂಚಿತ್ ಸಂಜೀವ್ ಅವರು ಪ್ರಶಾಂತ್ ಅಲಿಯಾಸ್ ‘ಪಚ್ಚ’ ಎಂಬ ವಿಭಿನ್ನ ಛಾಯೆಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಮಧ್ಯಮ ವರ್ಗದ ಸಾಮಾನ್ಯ ಬದುಕು ನಡೆಸುತ್ತಿದ್ದ ಯುವಕನೊಬ್ಬ ಪರಿಸ್ಥಿತಿಗಳ ಒತ್ತಡಕ್ಕೆ ಸಿಲುಕಿ ಅಪರಾಧ ಜಗತ್ತಿನೊಳಗೆ ಪ್ರವೇಶಿಸುವುದು, ಬಳಿಕ ಅದೇ ಲೋಕದಲ್ಲಿ ತನ್ನದೇ ಪ್ರಭಾವವನ್ನು ರೂಪಿಸಿಕೊಳ್ಳುವ ಹಾದಿಯನ್ನು ಸಿನಿಮಾ ರೋಚಕವಾಗಿ ತೆರೆದಿಡುತ್ತದೆ. ಪಾತ್ರಕ್ಕೆ ತಕ್ಕ ಸಂಚಿತ್ ಅವರ ನಟನೆ, ಬಾಡಿ ಲಾಂಗ್ವೇಜ್ ಹಾಗೂ ಮಾಸ್ ಮ್ಯಾನರಿಸಂ ಗಮನ ಸೆಳೆದಿದೆ.

ವಿವೇಕ್ ನಿರ್ದೇಶನದ ಈ ಸಿನಿಮಾ 2001ರಿಂದ 2011ರ ಅವಧಿಯ ಮೈಸೂರು ಹಿನ್ನೆಲೆಯನ್ನು ಆಧರಿಸಿದೆ. ಆ ಕಾಲದ ಸ್ಥಳೀಯ ರಾಜಕೀಯ, ಗ್ಯಾಂಗ್‌ಗಳ ನಡುವಿನ ಸಂಘರ್ಷ, ಕುಟುಂಬದ ಭಾವನೆಗಳು ಹಾಗೂ ಪ್ರೀತಿಯ ನಡುವಿನ ನಾಯಕನ ಬದುಕಿನ ಏರಿಳಿತಗಳನ್ನು ಕಥೆಯ ಪ್ರಮುಖ ಅಂಶಗಳಾಗಿ ಕಟ್ಟಿಕೊಡಲಾಗಿದೆ. ಸಂಚಿತ್ ಜೊತೆಗೆ ಮಯೂರ್ ಪಟೇಲ್, ಹಂಸಾ, ‘ಉಗ್ರಂ’ ಮಂಜು, ಹರಿಣಿ ಶ್ರೀಕಾಂತ್ ಹಾಗೂ ಜೈ ಗೋಪಿನಾಥ್ ಸೇರಿದಂತೆ ಹಲವು ಕಲಾವಿದರು ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.

ಚಿತ್ರಮಂದಿರಗಳಲ್ಲಿ ‘ಮ್ಯಾಂಗೋ ಪಚ್ಚಾ’ ವೀಕ್ಷಿಸಲು ಸಾಧ್ಯವಾಗದ ಸಿನಿಪ್ರಿಯರಿಗೆ ಇದೀಗ ಮನೆಯಲ್ಲೇ ಕುಳಿತು ಸಿನಿಮಾ ನೋಡುವ ಅವಕಾಶ ದೊರೆತಿದೆ. ಮೈಸೂರಿನ ಭೂಗತ ಲೋಕದ ನಡುವೆ ‘ಪಚ್ಚ’ನ ಬದುಕು ಸಾಗುವ ರೋಚಕ ಕ್ರೈಂ ಜರ್ನಿಯನ್ನು ಒಳಗೊಂಡಿರುವ ಈ ಮಾಸ್ ಆಕ್ಷನ್ ಥ್ರಿಲ್ಲರ್ ಜಿಯೋಹಾಟ್‌ಸ್ಟಾರ್‌ನಲ್ಲಿ ವೀಕ್ಷಣೆಗೆ ಲಭ್ಯವಾಗಿದೆ.