ಕನ್ನಡ ಸಿನಿಮಾ ಇತಿಹಾಸದಲ್ಲಿಯೇ ಅತಿ ಹೆಚ್ಚು ಕಲೆಕ್ಷನ್‌ ಮಾಡಿದ ಕೆಜಿಎಫ್‌ನ ದಾಖಲೆಯನ್ನು ಮುರಿಯುವತ್ತ  ಚಾಲೆಂಜಿಂಗ್ ಸ್ಟಾರ್ ದರ್ಶನ್‌ ನಟನೆಯ ಕುರುಕ್ಷೇತ್ರ ಹೆಜ್ಜೆ ಹಾಕುತ್ತಿದೆ. ಉತ್ತರ ಕರ್ನಾಟಕದಲ್ಲಿ ಮಳೆಯ ಪ್ರವಾಹದಿಂದ ಚಿತ್ರಕ್ಕೆ ಸ್ವಲ್ಪ ಮಟ್ಟಿಗೆ ಏಟು ಕೊಟ್ಟಿರೋದು ನಿಜ. ಮಳೆ ಇಲ್ಲದ್ದಿದಲ್ಲಿ ಕೆಜಿಎಫ್ ದಾಖಲೆ ಮುರಿಯುತ್ತಿತ್ತು ಎಂಬ ಮಾತುಗಳು  ಕೇಳಿಬರುತ್ತಿವೆ.

ಹೌದು, ಕಳೆದ ವಾರ ಬಿಡುಗಡೆಯಾಗಿ ಎಲ್ಲ ಕಡೆಯೂ ಹೌಸ್‌ ಫುಲ್‌ ಪ್ರದರ್ಶನ ಕಾಣುತ್ತಿರುವ ಕುರುಕ್ಷೇತ್ರ ಈಗ ಮೂವತ್ತು ಕೊಟಿ ಕಲೆಕ್ಷನ್‌ ಕಂಡಿದೆ ಎನ್ನಲಾಗುತ್ತಿದೆ.

ಬಿಡುಗೆಯಾದ 300 ಕೇಂದ್ರಗಳಲ್ಲಿಯೂ ಸಿನಿಮಾ ತುಂಬಿದ ಗೃಹಗಳಲ್ಲಿ ಪ್ರದರ್ಶನ ಕಾಣುತ್ತಿದ್ದು, ಚಿತ್ರಕ್ಕೆ ರಿಪೀಟ್‌ ಆಡಿಯನ್ಸ್‌ ಹೆಚ್ಚಾಗುತ್ತಿದ್ದಾರೆ. ಇನ್ನು ಈ ಸಿನಿಮಾ ವಿತರಕರೇ ಮಾಹಿತಿ ನೀಡುವಂತೆ ಮೊದಲ ದಿನ 13 ಕೊಟಿ ರೂಪಾಯಿ ಗಳಿಸಿತ್ತು. ಆದಾದ ಮೇಲೆ ಎರಡನೇ ದಿನ ಮತ್ತು ಮೂರನೇ ದಿನಕ್ಕೆ ಸಿನಿಮಾ ಕಲೆಕ್ಷನ್‌ 20 ಕೋಟಿ ದಾಟಿತ್ತು. ಮೊದಲ ವಾರ ಸುಮಾರು 30ಕೋಟಿಗೂ ಅಧಿಕ ಗಳಿಸಿದೆ ಎನ್ನಲಾಗುತ್ತಿದ್ದು,ಇದೆಲ್ಲವನ್ನು ನೋಡಿ ಜತೆಗೆ, ಈಗ ಕಾಣುತ್ತಿರುವಂತೆ ಮುಂದೆಯೂ  ಇದೆ ರೀತಿ ತುಂಬಿದ ಗೃಹಗಳ ಪ್ರದರ್ಶನ ಕಂಡರೆ ಸಿನಿಮಾ ಆದಷ್ಟು ಬೇಗ ಕೆಜಿಎಫ್‌ ದಾಖಲೆಯನ್ನು ಮುರಿಯಬಹುದು ಎನ್ನುತ್ತಾರೆ ಬಾಕ್ಸ್‌ ಆಫೀಸ್‌ ಪಂಡಿತರು.

ಇನ್ನು ಸಿನಿಮಾ ತೆಲುಗು, ತಮಿಳು, ಮಲಯಾಳಂ, ಹಿಂದಿ ಭಾಷೆಗಳಲ್ಲಿಯೂ ಬಿಡುಗಡೆಯಾಗಿದ್ದು, ಅಲ್ಲಿಯೂ ಉತ್ತಮ ಪ್ರದರ್ಶನ ಕಾಣುತ್ತಿದೆ. ಯಾವ ಭಾಷೆಯಲ್ಲಿಯೂ ಸ್ಟಾರ್‌ಗಳ ಸಿನಿಮಾ ಇಲ್ಲದೇ ಇರುವುದು ಕುರುಕ್ಷೇತ್ರಕ್ಕೆ ನೆರವಾಗಿದೆ. ಹಾಗಾಗಿ ಇದು ಆದಷ್ಟು ಬೇಗ ನೂರು ಕೋಟಿ ಕ್ಲಬ್‌ ಸೇರುತ್ತದೆ ಎನ್ನುವ ಮಾತುಗಳು ಗಾಂಧಿನಗರದಲ್ಲಿ ಕೇಳಿ ಬರುತ್ತಿದೆ.

ಅರ್ಜುನ್‌ ಸರ್ಜಾ, ಸ್ನೇಹಾ, ನಿಖಿಲ್‌ಕುಮಾರ್‌, ಮೇಘನಾ ರಾಜ್‌, ಅಂಬರೀಷ್‌ ಸೇರಿದಂತೆ ಬಹು ತಾರಾಗಣ ಸಿನಿಮಾದಲ್ಲಿದೆ.

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ನಟನೆಯ 50ನೇ ಸಿನಿಮಾ ‘ಕುರುಕ್ಷೇತ್ರ’ ಬಿಡುಗಡೆಯಾದ ದಿನದಿಂದಲೂ ಭರ್ಜರಿ ಪ್ರದರ್ಶನ ಕಾಣುತ್ತಿದ್ದು, ರಾಜ್ಯದೆಲ್ಲೆಡೆ ಅದ್ಬುತ ಗಳಿಕೆ ಮಾಡುತ್ತಿದೆ. ಇದೇ ಸಮಯದಲ್ಲಿ ಕೆನಡಾ, ಅಮೆರಿಕಾದಲ್ಲೂ ಸಿನಿಮಾವನ್ನು ಅಭಿಮಾನಿಗಳು ನೋಡಿ ಖುಷಿಯಾಗಿದ್ದಾರೆ.

ದರ್ಶನ್‌, ಅರ್ಜುನ್ ಸರ್ಜಾ, ನಿಖಿಲ್‌ಕುಮಾರ್‌, ಸ್ನೇಹಾ, ಶಶಿಕುಮಾರ್‌, ರವಿಚಂದ್ರನ್‌, ಅಂಬರೀಷ್‌ ಸೇರಿದಂತೆ ಸಾಕಷ್ಟು ಮಂದಿ ನಟಿಸಿರುವ ಈ ಸಿನಿಮಾ ಈಗಾಗಲೇ ಕೆನಡಾ, ಆಸ್ಟ್ರೇಲಿಯಾ, ಅಮೇರಿಕಾಗಳಲ್ಲಿ ಬಿಡುಗಡೆಯಾಗಿದೆ. ಅಲ್ಲಿಯೂ ಅಭಿಮಾನಿಗಳು ತುಂಬಿದ ಗೃಹದಲ್ಲಿ ಸಿನಿಮಾವನ್ನು ನೋಡುತ್ತಿದ್ದಾರೆ. ಅಮೇರಿಕ ಒಂದರಲ್ಲೇ 4 ದಿನಕ್ಕೆ 22 ಲಕ್ಷ ಗಳಿಕೆ ಕಂಡಿದೆ.

ಉತ್ತರ ಕರ್ನಾಟಕ ಭಾಗದಲ್ಲಿ ಮಳೆಯ ಕಾರಣ ಕೊಂಚ ಕಮ್ಮಿ ಕಲೆಕ್ಷನ್ಸ್ ಇದೆ ಅದು ಬಿಟ್ಟರೆ ಚಿತ್ರ ಬಿಕೆಟಿ ಮತ್ತು ಮೈಸೂರು ಭಾಗದಲ್ಲಿ ಭರ್ಜರಿ ಪ್ರದರ್ಶನ ಕಾಣುತ್ತಿದೆ. ಬೆಂಗಳೂರಿನಲ್ಲಿ 6ನೇ ದಿನವೂ ಚಿತ್ರಕ್ಕೆ 380ಕ್ಕೂ ಹೆಚ್ಚು ಶೋಗಳು ಸಿಕ್ಕಿದೆ.

ಸದ್ಯದ ಮಾಹಿತಿ ಪ್ರಕಾರ ಸಿನಿಮಾ ಮೊದಲ ವಾರವೇ 30 ಕೋಟಿ ಗಳಿಸುವತ್ತ ಸಾಗಿದೆ. ಹಾಗಾಗಿ 2019ರ ಬ್ಲಾಕ್‌ ಬಸ್ಟರ್‌ ಹಿಟ್‌ ಸಿನಿಮಾ ಎಂದು ಕುರುಕ್ಷೇತ್ರವನ್ನು ಜನ ಪರಿಗಣಿಸುತ್ತಿದ್ದಾರೆ. ಯಜಮಾನ ಚಿತ್ರವು ಸಾಧಾರಣ ಯಶಸ್ಸು ಕಂಡಿದ್ದರಿಂದ ಬೇಸರಗೊಂಡಿದ್ದ ದರ್ಶನ್ ಅಭಿಮಾನಿಗಳು ಕುರುಕ್ಷೇತ್ರ ಚಿತ್ರದ ಯಶಸ್ಸು  ಕಂಡು ಫುಲ್ ಖುಷ್ ಆಗಿದ್ದಾರೆ.

ಆಗಸ್ಟ್‌ 15 ರಿಂದ ಕುರುಕ್ಷೇತ್ರ ತಮಿಳು ಅವತರಿಣಿಕೆ ಬಿಡುಗಡೆಯಾಗುತ್ತಿದೆ. ಒಟ್ಟಿನಲ್ಲಿ ಕುರುಕ್ಷೇತ್ರ ಭಾರತ, ಅಮೇರಿಕಾ ಎಲ್ಲ ಕಡೆಯೂ ಉತ್ತಮ ಪ್ರದರ್ಶನ ಕಾಣುತ್ತಿದೆ.

ಮಯೂರ ಮೋಷನ್ ಪಿಕ್ಚರ್ಸ್ ಲಾಂಛನದಲ್ಲಿ ಮಂಜುನಾಥ್ ಡಿ ಅವರು ನಿರ್ಮಿಸಿರುವ `ವೀಕ್ ಎಂಡ್` ಚಿತ್ರ ಕಳೆದ ತಿಂಗಳು ಬಿಡುಗಡೆಯಾಗಿ ಪ್ರದರ್ಶನ ಕಾಣುತಿದೆ. ಈ ಚಿತ್ರ 35 ದಿನಗಳು ಪೂರೈಸಿದ ಸಂದರ್ಭದಲ್ಲಿ ಸಿರಸಿ ಸರ್ಕಲ್‍ನಲ್ಲಿರುವ ಗೋಪಾಲನ್ ಸಿನಿಮಾಸ್‍ನಲ್ಲಿ ಚಿತ್ರತಂಡ ಕೇಕ್ ಕತ್ತರಿಸುವ ಮೂಲಕ ಸಂಭ್ರಮಾಚರಣೆ ಮಾಡಿದರು.

ಈ ಸಂದರ್ಭದಲ್ಲಿ ಆರ್,ಎಂ.ಎಸ್ ಇಂಟರ್ ನ್ಯಾಷನಲ್ ಶಾಲೆಯ ಮುಖ್ಯಸ್ಥರಾದ ರತ್ನಮ ಶ್ರೀನಿವಾಸ್ ಹಾಗೂ ಶಾಲೆಯ ಪ್ರಾಂಶುಪಾಲರು ಮುಖ್ಯಅತಿಥಿಗಳಾಗಿ ಆಗಮಿಸಿ ಶುಭ ಕೋರಿ ಚಿತ್ರವನ್ನು ವೀಕ್ಷಿಸಿದರು. ನಾಯಕ ಮಿಲಿಂದ್, ನಿರ್ದೇಶಕ ಶೃಂಗೇರಿ ಸುರೇಶ್ ಸೇರಿದಂತೆ ಚಿತ್ರತಂಡ ಬಹುತೇಕ ಸದಸ್ಯರು ಉಪಸ್ಥಿತರಿದ್ದರು. ಚಿತ್ರ ಈಗ 35ದಿನಗಳನ್ನು ಪೂರೈಸಿ 50ನೇ ದಿನದತ್ತ ಮುನ್ನಡೆಯುತ್ತಿದೆ.

ಶೃಂಗೇರಿ ಸುರೇಶ್ ನಿರ್ದೇಶನದ ಈ ಚಿತ್ರಕ್ಕೆ ಶಶಿಧರ್ ಅವರ ಛಾಯಾಗ್ರಹಣವಿದೆ. ಮನೋಜ್ ಸಂಗೀತ ನಿರ್ದೇಶನ, ರುದ್ರೇಶ್ ಸಂಕಲನ, ಬಾಬು ಖಾನ್ ಕಲಾ ನಿರ್ದೇಶನ, ಮಂಜುನಾಥ್ ಜಂಬೆ ಸಹ ನಿರ್ದೇಶನ ಹಾಗೂ ರಾಮು, ಯೋಗಾನಂದ್ ನಿರ್ಮಾಣ ನಿರ್ವಹಣೆಯಿದೆ.

ಮಿಲಿಂದ್ ಅವರು ನಾಯಕನಾಗಿ ಅಭಿನಯಿಸಿರುವ ಈ ಚಿತ್ರದ ನಾಯಕಿ ಸಂಜನಾ ಬುರ್ಲಿ. ಹಿರಿಯ ನಟ ಅನಂತನಾಗ್, ಗೋಪಿನಾಥ್ ಭಟ್, ಮಂಜುನಾಥ್, ನಾಗಭೂಷಣ್, ನೀನಾಸಂ ರಘು, ನವನೀತ, ನಟನ ಪ್ರಶಾಂತ್, ನೀತು ಬಾಲಾ, ವೀಣಾ ಜಯಶಂಕರ್, ಬ್ಯಾಂಕ್ ಸತೀಶ್, ಶಿವಕುಮಾರ್, ಸಂಜಯ್ ನಾಗೇಶ್, ಮಂಜುನಾಥ್ ಶಾಸ್ತ್ರಿ ಮುಂತಾದವರು ಈ ಚಿತ್ರದ ತಾರಾಬಳಗದಲ್ಲಿದ್ದಾರೆ.

ತೆಲುಗಿನಲ್ಲಿ ಕಲ್ಟ್‌ ಸಿನಿಮಾ ಎಂದೇ ಹೆಸರುವಾಸಿಯಾಗಿ ದೊಡ್ಡ ಹಿಟ್‌ ಆಗಿದ್ದ ಅರ್ಜುನ್‌ ರೆಡ್ಡಿ ಈಗ ಹಿಂದಿಯಲ್ಲಿ ಕಬೀರ್‌ ಸಿಂಗ್‌ ಆಗಿ ರಿಲೀಸ್‌ ಆಗಿದ್ದು, ಕಳೆದ ವಾರ ಬಿಡುಗಡೆಯಾಗಿದ್ದ ಈ ಸಿನಿಮಾ ಈಗ ಬಾಲಿವುಡ್‌ನ ಹಿಟ್‌ ಲೀಸ್ಟ್‌ಗಳಲ್ಲಿ ಸೇರಿಕೊಂಡಿದೆ.

ಮಿಶ್ರ ಪ್ರತಿಕ್ರಿಯೆ ಪಡೆದುಕೊಂಡಿದ್ದ ಈ ಚಿತ್ರವನ್ನು ಇದೊಂದು ಕೆಟ್ಟ ಸಿನಿಮಾ ಎಂದು ಬಿಂಬಿತವಾಗಿತ್ತು. ಆದರೆ ಜನ ಮಾತ್ರ ಚಿತ್ರಮಂದಿರಕ್ಕೆ ಹೋಗಿ ಸಿನಿಮಾವನ್ನು ನೋಡುತ್ತಲೇ ಇದ್ದಾರೆ. ಹಾಗಾಗಿ ಚಿತ್ರ ಐದೇ ದಿನಗಳಲ್ಲಿ ನೂರು ಕೋಟಿ ಕ್ಲಬ್‌ ಸೇರಿದೆ. ಈ ಮೂಲಕ ಶಾಹಿದ್‌ ಕಪೂರ್‌ ಸಹ ನೂರು ಕೋಟಿ ಕ್ಲಬ್‌ ಸೇರಿದ ಹೀರೋಗಳ ಸಾಲಿಗೆ ಸೇರಿಕೊಂಡಿದ್ದಾರೆ.

ಯಾವುದೇ ಸರ್ಕಾರಿ ರಜೆ ಇಲ್ಲದೇ ಹೋದರೂ ಈ ಚಿತ್ರ ಇಷ್ಟೊಂದು ಹಣ ಗಳಿಸಿರುವುದರಿಂದ ಶಾಹಿದ್ ಕಪೂರ್‌ ಮತ್ತು ಸಂದೀಪ್‌ ವಂಗಾ ರೆಡ್ಡಿ ಫುಲ್‌ ಖುಷಿಯಾಗಿದ್ದಾರೆ. ಶಾಹಿದ್ ಕಪೂರ್ ನಟನೆಗೆ ಯುವ ಸಮೂಹ ಮಾರುಹೋಗಿದೆ. ಈ ವರ್ಷದ ಬಿಗ್ಗೆಸ್ಟ್ ಬ್ಲಾಕ್‌ಬಸ್ಟರ್ ಆಗಲಿದೆ ಎನ್ನುತ್ತಿದ್ದಾರೆ ಬಾಲಿವುಡ್ ಪಂಡಿತರು.

ಸಲ್ಮಾನ್‌ ಖಾನ್‌ ಮತ್ತು ಕತ್ರಿನಾ ಕೈಫ್‌ ನಟನೆಯ ಭಾರತ್‌ ಸಿನಿಮಾದ ಕಲೆಕ್ಷನ್‌ ಬಿಡುಗಡೆಯಾಗಿ ಒಂದು  ವಾರದ ನಂತರವೂ ಜೋರಾಗಿಯೇ ಆಗುತ್ತಿದೆ.

1947ರಿಂದ ಆರಂಭವಾಗುವ ಈ ಸಿನಿಮಾ 1990ರವರೆಗೂ ನಡೆಯುತ್ತದೆ. ಇದು ಕೋರಿಯನ್‌ ಚಿತ್ರದ ರಿಮೇಕ್‌ ಆಗಿದೆ.

ಇನ್ನು ಬಿಡುಗಡೆಯಾದ ಮೊದಲ ವಾರವೇ 175 ಕೋಟಿಗೂ ಅಧಿಕ ಹಣವನ್ನು ಭಾರತ್‌ ಗಳಿಸಿತ್ತು. ಈ ಸಿನಿಮಾ ಸಕ್ಸಸ್‌ ಆಗಿರುವುದಕ್ಕೆ ಸಂತಸಗೊಂಡಿರುವ ಸಲ್ಮಾನ್‌ ಖಾನ್‌ ಮತ್ತು ನಟಿ ಕತ್ರಿನಾ ಕೈಫ್‌, ಭಾರತ ಮತ್ತು ಪಾಕಿಸ್ತಾನ ವಿಭಜನೆಯ ಪ್ರತ್ಯಕ್ಷ ದರ್ಶಿಗಳನ್ನು ಭೇಟಿ ಮಾಡುತ್ತಿದ್ದಾರೆ.

ಹೀಗೆ ಭೇಟಿ ಮಾಡಿದ ವಿಡಿಯೋ ಮತ್ತು ಫೋಟೋಗಳು ಸೋಷಿಯಲ್‌ ಮೀಡಿಯಾದಲ್ಲಿ ಹರಿದಾಡುತ್ತಿವೆ